ПОЗДРАВЛЯЕМ Ю.Е.Кузьмину и В.В.Борисову, призеров республиканского фестиваля «Чăваш ачи чăвашах»!

2020 çулхи раштав уйăхĕн 7-мĕшĕнче «Чăваш ачи чăвашах» республика шайĕнчи IV фестиваль вĕçленчĕ. Ăна  Чăваш Республикин вӗренӳ институчĕн этнокультура вĕренĕвĕн  кафедри ирттерчĕ. Фестиваль тĕллевĕ  ̶  Чăваш Республикин шкулĕсенче тăван чĕлхепе культурăна атлантарасси.

Фестиваль ăмăртăвĕсем икĕ номинаципе иртрĕç. «Савăнатăп эп чăваш пулнишĕн» ăмăртăва шкул çулне çитмен тата шкулта вĕренекенсем хутшăнчĕç, чăваш халăхĕн пĕр-пĕр йăлине кăтартса паракан 35 видеоролик ярса пачĕç. «Вĕрентетпĕр чăвашла» ăмăртура шкулта чăваш чĕлхипе литературине вĕрентмен 22 учитель тупăшрĕç.

«Савăнатăп эп чăваш пулнишĕн» ăмăртура  «Ача-пăча ваййисем», «Сурхури уявĕ», «Вăйă карти», «Улахра» йăла-йĕркене кăтартакансем ытларах пулчĕç.

Чăваш халăхĕн йăлине тĕрĕсех  кăтартса паман ĕçсем те курăнкаларĕç, Тĕслĕхрен, ачасен тумĕпе йăла-йĕрке содержанийĕ килĕшсе тăнине хакланă май хĕрачасем пуçа масмак çыхни, арçын ачасем пиçиххисене сылтăм енне çыхманни, хĕрачасене икĕ кĕскĕллĕ хĕрарăм кĕписене тăхăнтартни, ачасен урисенчи пушмаксем тĕрлĕрен пулни, чăваш тумĕ тăхăннă хĕр ачасем икĕ çивĕтлĕ пулни, «Улах», «Сурхури улахĕ», «Вăйă картинче» йăласем ÿсĕм çулĕпе килĕшсе тăманни, асăннă йăла-йĕркепе çыхăнман юрăсемпе ташăсем хутăшса кайни тĕл пулчĕ. 

Ачасем тĕрĕс те илемлĕ калаçни, хăйсене сцена çинче тивĕçлĕ тытни, хаваслă çаврăнăçуллă пулни, чăваш йăли-йĕркине кăтартса парас ĕçе кăмăлпа хутшăнни жюри членĕсене чунтан савăнтарчĕ.

«Вĕрентетпĕр чăвашла» ăмăртăва  математика, географи, геометри, обществознани, вырăс чĕлхипе литератури, акăлчан чĕлхи вĕрентекенсем хутшăнчĕç.  Вĕсене хавхалантарнă, урок планĕпе конспектне хатĕрлеме пулăшнă чăваш чĕлхипе литература учителĕсене Чăваш Республикин вӗренӳ институчĕн этнокультура вĕрентĕвĕ кафедрин ĕçченĕсем тав сăмахĕ калаççĕ, малалла та хастар пулма сунаççĕ.